يُحكى ، والعهدة على من روى ، أن خميس الشماري إستبدّت به هذه الأيام الكوابيس المؤرقة ، فأصبح يرى في منامه رؤى أقضت مضاجعه ، من ذلك أنه رأى منذ أيام قليلة أن ماردَين من الجنّ يُدعيان " خَمْسَوَيْهْ " و " شَمْرَوَيْهْ " قد حطّا عند رأسه ، وطالباه بأن يفتح أمامهما على الفور ملفاته الحقوقية لينظرا في تحيينها ويجددا له النصح بما يجب أن يكون ، وما لا يكون ...
ـ خميّــس : ( مذعورا ) يا مرحبا بأولاد سيدي ،، وينكم وينكم ،، آش هـا الغيبــة .
• خمْسوَيْـهْ : يزٍّي يا بلعوط ،، إتكلّم جهار ،، آخي نحنا إبعدنا عليك نهار ،، نحنا ديما معاك في يقظتك وفي منامك ، تلقانا وراك و قدّامك .
* شَمْرَوَيـْهْ : يا خمّوس يكفيك منٍ التبهليل واخطاك منِ التبرويل ،، لوكان موش نحنا عند راسك من الصباح لليل منين باش يوصللك التقلقيل .
ـ خميّــس : برّ هكّاكة برّ هكاكة ،، الحق ما ريت من صحبتكم كان الخير والمصوار الكثير ،، بفضلها كبّرت برشة صغار وصغّرت برشة كبـار .
* شَمْرَوَيـْهْ : هيا عاد ورّينا ومتخبّي شيّ علينا ،، مكانش نقصّو عليك العلفة لين ساقيك تحفى ،، وإنت تعرف القوادات اللي دبرناها عليك هي اللي فرهدت أيامك ولياليك ...
• خمْسَوَيْـهْ :
(يتدخل مقاطعا) والعمالة .. والنذالة ،، موش هوما اللي رجّعوك يا صحوبة مريقل ،، وفي أحسن حالة .
ـ خميّــس : مانيش ناكر ،، أنا منِ القوَادة دبرت راسي ياسر وعمري ما كنت خاسر وفلوس الخيانة ؟ آخي نسيتو اللي أنا عبّيت منها خزانة،، والتكمبين زادة طلع ياسر بنين ،،
صحيح خذيت ياسر فلوس من عند الفرنسيس والألمان والأمريكان ، ومن الفيدرالية الدولية لحقوق الإنسان ومراسلين بدون حدود وحتى من جماعة البرلمان الأوروبي،، أما مانيش وحدي خذيت إلكلهم كلاو كيفي كيما الشابي والمرزوقي والطريفي وبن جعفر والجندوبي،، آش باش نسمي وآش باش إنعد ...
أما السوق توّا ضربو الكساد وقت إللي دخلو فيه برشة فسّاد ،، قريب يقطعولنا خبزتنا ويكملو على مرمّتنا ،، هاكم تشوفو آش عاملين راضية وراجلها حمّة ،، وسهام وراجلها عمار ، بلعو الملمّة واللّي ثمّة ،، حتى الذري متاع توة ، ببّوش بو مصة خلونا في النكد والغصة .
• خمسَوَيْـه : نعرفوك على طول ملهوف ،، حياتك الكل تسرق وتحوف مرة بالسر ومرة بالمكشوف ... ديما تأكل وتصيح ،، وإللي تجيبو المطر يهزو الريح .. المهم بعد هذا الكل إسمع مليح وخلّي عندك عقل ، ياللي حسبناك راجل ، آخي طلعت سطل .
* شَمْرَوَيـْهْ : ( ساخطا في وجه خميس ) ركّح اللعب ونقّص شويّة ،، راهي ريحتك اليوم فاحت في كل ثنيّة ،، ما تدخل جمعية إلاّ وتخلّف وراك ألف رزيّة ورزيّة ،، وما تدخل حزب من الأحزاب إلاّ وتخلّي في جرتك العذاب والخراب .
ـ خميّــس : ( مندهشا ) آخي أنا مخدّر ،، وإلاّ بالرسمي ،، ابليس صار ينهي عالمنكر .
• خمْسوَيْـهْ : حتّى إنت كثرتلها ، قلنالك على الخل عملت ما يقطع المسمار باش ترضّى القورّة وتعادي أٌمّالي الدار... والله فضحتنا وطيحتلنا قدرنا بين الشواطن ، وانت باقي بمصايبك موش فاطن .
* شَمْرَوَيـْهْ :
بدّل التكتيك ،، ومشّي وحيّد إضراب جوع ، وقول اللي الماكلة صارت ممنوع ،، فمّاش ما تجدّ هالمسرحية على الصحافة الأجنبية ، بالخصوص كي تظهر قدّامهم كيفك كيف الوليّة .
• خمْسوَيْـهْ : قلنالك ،، إضراب مضروب ، باش تظهر التصويرة بالمقلوب كيما اللي عملو بالحيلة وقت اللي حصُل ولد قسيلة ... وكيما اللي عملو أحمد نجيب وقت اللى حسّ روحو باش إيخيب ... واعطف على ميّة اللي مازالت اتبع فيه كالبوهالية .
* شَمْرَوَيـْهْ : نحبّوك تظهر مصروع ،، كانك ميّت من الجوع ، مكانش نطردوك من العيلة ، ونقطعو عليك الصبّة ، ونخلّوك تمشي من كبّة الكبّة.
ثم اشتدّ به الأنين ، ولم يلبث أن إنتفض فأيقظ " للاّت العين " ،، وقصّ عليها تفاصيل المنامة ، فقيّمت على راسو القيامة ،، وصاحت في وجهه قائلة : " موش قتلك يا عزا ،، بطّل التعسيلة كيف تاكل ماكلة ثقيلة ،، وبطّل زادة النوم كيف تبدا متخوم ،، خيّر واختار ،،، وما تخلّيناش في الحشمة والعار ،، هالكابوس هذا جا مع الجنون ،، و يا عالم غدوة آش باش يكون " ..
همهم خمّوس في صمت ، وبعد تفكير طويل قال : " يا عزيزتي آنا اخترت النوم باش انسلّم فيه ،،، على خاطر الجوع – برجولية – ما نقدرشي عليه " .
